بحیرہ احمر میں صیہونی حکومت آنے والے بحری جہازوں پر یمن کے حوثی گروپ کے حملوں کے بعد سکیورٹی خدشات کی بناء پر ڈنمارک اور فرانس کی شپنگ کمپنیوں نے بحیرہ احمر میں اپنے جہازوں کی آمدو رفت معطل کردی۔
شپنگ کمپنیوں کا کہنا ہے بحیرہ احمر میں سکیورٹی صورتِ حال خراب ہوتی جا رہی ہے، بحیرہ احمر میں سروسز تاحکم ثانی معطل رہیں گی۔
امریکی اور برطانوی جنگی جہازوں نے گزشتہ رات حوثیوں کے 15 ڈرون حملے ناکام بنانے کا دعویٰ کیا تھا۔
خیال رہے کہ 7 اکتوبر سے حماس اور صیہونی حکومت کے درمیان جاری جنگ کے بعد حوثیوں نے حالیہ ہفتوں میں بحری جہازوں پر اپنے حملے تیز کر دیے ہیں۔ حوثیوں نے صیہونی حکومت کی جانب ڈرون اور میزائل بھی داغے تھے۔
یمن کے زیادہ تر حصے پر قابض حوثی باغیوں نے اس وقت تک اپنے حملے جاری رکھنے کا عہد کیا جب تک کہ صیہونی حکومت غزہ میں اپنی جارحیت بند نہیں کر دیتا۔ تاہم انہوں نے جمعہ کو کہا تھا کہ وہ صرف صیہونی بندرگاہوں کی طرف جانے والے جہازوں کو نشانہ بناتے ہیں۔