امریکی ایوان نمائندگان نے صدر جوبائیڈن کے مواخذے کی تحقیقات سے متعلق باضابطہ منظوری دیدی جب کہ صدر بائیڈن نے ایوان کے اقدام کو بے بنیاد اور سیاسی شعبدہ بازی قراردیدیا۔
ری پبلکن کے زیر اثر ایوان میں ہونے والی ووٹنگ میں تحقیقات سے متعلق قرارداد کے حق میں 221 اور مخالفت میں 212 ووٹ آئے۔
یہ اس بات کی تحقیقات کے لیے کیا جارہاہے کہ آیا صدر بائیڈن نے اپنے بیٹے ہنٹربائیڈن کے بیرون ممالک کاروبار سے فائدہ اٹھایا یا نہیں۔ ہنٹر بائیڈن نے ایوان کی کمیٹی کے سامنے بند کمرے میں پیشی سے انکار کردیا تھا اور کہا تھا کہ وہ عوام کے سامنے پیشی چاہتےہیں اوریہ بھی کہ جوبائیڈن بے قصور ہیں۔
ری پبلکنز کا الزام ہے کہ ہنٹربائیڈن نے یوکرین اورچین میں کاروبار کیے اور غیرملکی کاروباری شخصیات کو اس وقت کے نائب صدر جوبائیڈن تک رسائی کی یقین دہانیاں کرائیں تاہم شواہد پیش نہیں کیے گئے کہ آیا بائیڈن نے کسی کو فائدہ دیا یا خود فائدہ اٹھایا۔
اپنے ردعمل میں صدر بائیڈن نے کہا کہ ری پبلکنز ضروری اقدامات کے بجائے ان بے بنیاد باتوں پر وقت ضائع کررہے ہیں جن کے بارے میں ری پبلکن اراکین کانگریس خود تسلیم کرتے ہیں کہ ان کے پاس شواہد نہیں ہیں۔
صدر جوبائیڈن کا مواخذہ اس لیے ناممکن ہے کہ ایوان اگر مواخذہ منظور بھی کرلے تو معاملہ سینیٹ میں جائے گاجہاں ڈیموکریٹس کو 49 کے مقابلے میں 51 ووٹوں کی اکثریت حاصل ہے۔