جنگی جنون میں مبتلا صیہونی وزیراعظم بن یامین نیتن یاہو نے عالمی دباؤ کو نظرانداز کرتے ہوئے کہا ہے کہ صیہونی حکومت آخر تک جنگ جاری رکھے گا، ہمیں کوئی چیز نہیں روک سکتی۔
ہٹ دھرمی برقرار رکھتے ہوئے جنگ جاری رکھنے پر بضد صیہونی وزیراعظم نے کہا کہ فتح کے حصول تک غزہ میں صیہونی حکومت کی جنگ جاری رہے گی۔
صیہونی وزیر خارجہ ایلی کوہن کا کہنا تھا کہ عالمی حمایت ساتھ ہو یا نہ ہو لیکن حماس کے خلاف صیہونی حکومت کی جنگ جاری رہے گی، اس مرحلے پر جنگ بندی ایک بہت بڑی غلطی ہوگی۔
ایلی کوہن کا کہنا تھا کہ اس مرحلے پر جنگ بندی حماس کیلئے تحفہ ہوگی اور ہم نہیں چاہتے کہ یہ خطرہ صیہونیوں کے سروں پر دوبارہ منڈلاتا رہے۔
صیہونی وزیر خارجہ نے بین الاقوامی جہازرانی (Shiping lanes) کے تحفظ کیلئے عالمی برادری کو مؤثر اور جارحانہ رویے کا مظاہرہ کرنے کا مشورہ دیا۔
خیال رہے کہ گزشتہ روز وائٹ ہاؤس میں اپنی انتخابی مہم کیلئے چندہ جمع کرنے کی ایک تقریب میں امریکی صدر نے کہا تھا کہ صیہونی حکومت غزہ میں بلا تفریق بمباری کے باعث اپنی عالمی حمایت کھو رہا ہے، صیہونی وزیراعظم نیتن یاہو کو اپنی سخت گیر حکومت کو تبدیل کرنے کی ضرورت ہے۔
امریکی صدر کا کہنا تھا کہ موجودہ صیہونی حکومت کی تاریخ کی سب سے قدامت پرست حکومت ہے، نیتن یاہو کو اپنی حکومت میں تبدیلیاں کرنے کی ضرورت ہے کیونکہ یہ حکومت صیہونیوںکیلئے مشکلات پیدا کر رہی ہے۔
جوبائیڈن کا کہنا تھا کہ نیتن یاہو کو سمجھنا ہو گا کہ عالمی دباؤ کے بعد مستقبل میں فلسطینی ریاست کے قیام سے انکار نہیں کرسکتے کیونکہ یہ بہت مشکل ہوگا۔