راولپنڈی پولیس نے ملک دشمن قرار دیے جانے والے اشتہاری ملزم عادل فاروق راجہ کی جائیداد نیلامی کیلئے عدالت سے اجازت طلب کرلی۔
پولیس نے سول جج جوڈیشل مجسٹریٹ ممتاز ہنجرا کی عدالت میں درخواست دائر کی ہے جس میں مؤقف اختیار کیا گیا ہے کہ اشتہاری ملزم عادل فاروق راجہ تعزیرات پاکستان کی دفعہ 406 کے تحت گزشتہ سال 28 جون کو درج مقدمہ نمبر 848 میں نامزد ملزم ہے جس کے خلاف چالان بھی عدالت میں جمع ہو چکا ہے لیکن ملزم کی مسلسل روپوش ہے۔
درخواست میں کہا گیا ہے کہ اشتہاری ملزم عادل فاروق راجہ کی عدم حاضری اور روپوشی پر ضابطہ فوجداری کی دفعہ 88 کے تحت رواں سال 8 مارچ کو ملزم کی جائیداد قرق ہو چکی ہے لہٰذا ملزم کی ملکیتی مکان، پلاٹ اور گاڑیوں کی نیلامی کی اجازت دی جائے۔
تھانہ نصیر آباد پولیس نے رتہ امرال کے رہائشی کی مدعیت میں گزشتہ سال جون میں مقدمہ درج کیا تھا جس میں الزام تھا کہ عادل فاروق راجہ اور عمر زمان نے 2 افراد کو یورپ بھجوانے کیلئے 35 لاکھ روپے میں ڈیل کی۔
مقدمے میں کہا گیا ہے کہ ڈیل ہونے پر 25 لاکھ ایڈوانس دیے جبکہ باقی 10 لاکھ کام مکمل ہونے پر ادا کرنے تھے لیکن مذکورہ دونوں افراد نے نہ تو یورپ بھجوایا اور نہ ہی رقم واپس کر رہے ہیں۔
عادل فاروق راجہ کے خلاف انسانی اسمگلنگ، زمینوں پر قبضے اور گاڑیوں کی خریدو فروخت میں شہریوں سے فراڈ کے مختلف مقدمات تھانہ روات، تھانہ نصیر آباد اور تھانہ پیرودھائی میں درج ہیں۔
آئی ایس پی آر کے مطابق دونوں ریٹائرڈ افسران عادل فاروق راجہ اور حیدر رضا مہدی کو فیلڈ جنرل کورٹ مارشل کے ذریعے سزا سنائی گئی، دونوں ریٹائرڈ افسران کا پاکستان آرمی ایکٹ کے تحت فیلڈ جنرل کورٹ مارشل کیا گیا۔