صیہونی حکومت غزہ میں حماس کی سرنگوں کو سمندری پانی سے بھرنے پر غور کررہا ہے۔
امریکی اخبار کے مطابق امریکی حکام کا کہنا ہےکہ صیہونی حکومت غزہ میں سمندری پانی کو کھینچنے والے پمپوں کے ایک بڑے نظام کا انتظام کررہا ہے، یہ پمپس اس لیے لگائے جارہے ہیں تاکہ غزہ پٹی پر موجود فلسطینی مزاحمتی تنظیم حماس کے زیر استعمال سرنگوں کو پانی سے بھر سکے۔
رپورٹس کے مطابق صیہونی فوج نے نومبر کے وسط تک 5 پمپس کو پناہ گزینوں کے کیمپ الشطی کے ایک میل دور تک لگا لیا تھا جو ہزاروں کیوبک میٹر پانی فی گھنٹہ منتقل کرسکتے ہیں اور اس سے سرنگوں میں ہفتوں کے اندر سیلاب آسکتا ہے۔
میڈیا رپورٹس میں کہا گیا ہے یہ واضح نہیں کہ آیا صیہونی حکومت تمام یرغمالیوں کو رہا کرنے سے پہلے پمپ استعمال کرنے پر غور کرے گا کیونکہ حماس پہلے کہہ چکا ہے کہ اس نے یرغمالیوں کو محفوظ مقامات اور سرنگوں میں چھپا رکھا تھا۔
اس حوالے سے امریکی حکام نے مزید کہا کہ صیہونی حکومت کے لیے سرنگوں کو ناکارہ بنانا سمجھ میں آتا ہے اور صیہونی حکومت ایسا کرنے کے لیے بہت سے طریقے تلاش کر رہا ہے۔
دوسری جانب صیہونی فوج کی جانب سے اس حوالے سے کوئی تبصرہ نہیں کیا گیا تاہم انہوں نے یہ ضرور کہا کہ صیہونی فوجی مختلف فوجی اور تکنیکی آلات کا استعمال کرتے ہوئے مختلف طریقوں سے حماس کی دہشتگردی کی صلاحیتوں کو ختم کرنے کے لیے کام کر رہا ہے۔
واضح رہے کہ 7 اکتوبر کے بعد سے صیہونی حملوں میں تقریباً 16 ہزار فلسطینی شہید ہوچکے ہیں۔