امریکی خفیہ ادارے سینٹرل انٹیلیجنس ایجنسی (سی آئی اے) کی ایسوسی ایٹ ڈپٹی ڈائریکٹر اینالائسز نے سماجی رابطوں کی ویب سائٹ پر فلسطین کے حق میں تصویر شیئر کر دی۔
امریکی اخبار فنانشل ٹائمز کی ایک رپورٹ میں دعویٰ کیا گیا ہے کہ سی آئی کی عہدیدار نے 21 اکتوبر کے روز اپنے فیس بک اکاؤنٹ کی کوور فوٹو تبدیل کرتے ہوئے فلسطین کے حق میں تصویر پوسٹ کی تھی۔
رپورٹ کے مطابق خاتون عہدیدار نے اپنی پروفائل کے کوور فوٹو میں ایک شخص کی تصویر لگائی تھی جس نے اپنے ہاتھ میں فلسطینی پرچم تھاما ہوا تھا۔
اخبار نے دعویٰ کیا کہ خفیہ ادارے کی اہم عہدیدار کی جانب سے پبلک پلیٹ فارم پر سیاسی جھکاؤ ظاہر کرنے والی تصویر شیئر کرنا غیر معمولی اقدام تھا۔
رپورٹ کے مطابق معاملے سے متعلق مؤقف کیلئے رابطہ کرنے پر سی آئی کا کہنا تھا کہ بطور ایجنسی ہم جس طرح کام کرتے ہیں، اس اعتبار سے ہمارے افسران اپنی اینالیٹیکل آبجیکٹویٹی سے کمٹڈ ہیں۔
سی آئی اے نے اپنے مؤقف میں مزید کہا کہ ممکن ہے کہ کسی معاملے پر کوئی افسر اپنی ذاتی رائے بھی رکھتا ہو لیکن وہ رائے ان کی یا سی آئی اے کی غیرجانبداری کو بلکل بھی متاثر نہیں کرتی۔
خیال رہے کہ بائیڈن انتظامیہ کو صیہونی حکومت و فلسطین جنگ میں یکطرفہ اسرائیلی حمایت پر سفارت کاروں سمیت دیگر عہدیداروں کی جانب سے شدید تنقید اور ردعمل کا سامنا رہا، اس سلسلے میں یو ایس ایڈ کے سینکڑوں افسران نے جنگ بندی کیلئے امریکی صدر کو خط بھی لکھا تھا جبکہ محکمہ خارجہ سمیت مختلف محکموں کے کئی افراد نے اپنے عہدوں سے بھی استعفیٰ دے دیا تھا۔