ٹیسلا، اسپیس ایکس اور ایکس کے مالک ایلون مسک نے صیہونی حکومت کا دورہ کیا ہے جس کے دوران وہ ان علاقوں میں بھی گئے جہاں 7 اکتوبر کو حماس نے آپریشن طوفان الاقصیٰ کیا تھا۔
ایلون مسک 27 نومبر کی صبح تل ابیب پہنچے تھے جس کے بعد انہوں نے صیہونی وزیراعظم کےساتھ مختلف علاقوں کا دورہ کیا۔
ایلون مسک نے یہ دورہ اس وقت کیا ہے جب ان پر ایک ایسی پوسٹ پر ریپلائی کرنے پر شدید تنقید کی جا رہی ہے، جسے صیہونی حلقوں نے صیہونی حکومت مخالف قرار دیا تھا۔
اس کے بعد مختلف کمپنیوں نے ایکس کے لیے اشتہارات کو بھی روک دیا تھا۔
دورے کے دوران ایلون مسک نے صیہونی حکومت کی حمایت کا اعلان بھی کیا۔
ایلون مسک کے دورے کے موقع پر صیہونی حکومت کی جانب سے ان کے ساتھ ایک معاہدہ کرنے کا اعلان بھی کیا گیا۔
صیہونی وزیر کمیونیکیشن Shlomo Karhi نے اعلان کیا کہ ایلون مسک نے صیہونی حکومت کی مرضی کے بغیر غزہ کو اسٹار لنک سیٹلائیٹ انٹرنیٹ سروس فراہم نہ کرنے پر اتفاق کیا ہے۔
اس سے قبل ایلون مسک نے غزہ میں مواصلاتی نظام اور انٹرنیٹ بندش پر سیٹلائٹ انٹرنیٹ سروسز دینے کا اعلان کیا تھا، جس کی صیہونی حکومت کی جانب سے مخالفت کی گئی تھی۔