شامی ڈیفنس سسٹم نے اسرائیل کا میزائل حملہ ناکام بنا دیا

شام کے فضائی حفاظتی ادارے نے اعلان کیا ہے کہ اسرائیل کی جارح حکومت کی طرف سے دمشق کی جانب داغے گئے اکثر میزائلوں کو تباہ کر دیا گیا ہے۔ شام کے فضائی دفاع نے آج صبح (جمعہ) خبر دی ہے کہ اس نے دمشق پر حملہ کرنے والے صیہونی حکومت کے اکثر میزائلوں کو تباہ کر دیا ہے۔ شامی حکومت کے میڈیا ذرائع کا کہنا تھا کہ شامی ائیر ڈیفنس سسٹم نے دارالحکومت دمشق کے جنوبی علاقوں کو نشانہ بنانے والے بیشتر صیہونی میزائلوں کو مار گرایا ہے۔ اسی حوالے سے شام کے فوجی ذرائع نے میڈیا سے بات کرتے ہوئے بتایا کہ آج صبح 4 بج کر 20 منٹ پر اسرائیل نے مقبوضہ شام کی گولان ہائٹس سے میزائل داغے، جنہوں نے دمشق کے جنوبی شہر کے کچھ حصوں کو نشانہ بنایا، ڈیفنس سسٹم کی جوابی کارروائی سے بیشتر میزائل اپنے ہدف کو نشانہ بنانے میں ناکام ہوگئے۔

واقعے کی تفصیلات جاری کرتے ہوئے بشار حکومت کا کہنا تھا کہ اس جارحیت کے نتیجے میں ایک شہری زخمی جبکہ کئی عمارتوں کو نقصان پہنچا ہے۔ شامی سرزمین پر حالیہ میزائل حملے ایسے وقت میں ہوئے ہیں، جب تین روز قبل ہی ماسکو اور دمشق نے لڑاکا طیاروں اور ڈرونز کے خلاف مشترکہ فضائی مشق کا انعقاد کیا تھا۔ میڈیا رپورٹس کے مطابق، مشترکہ مشق کا مقصد شامی اور روسی فوجوں کے درمیان ہم آہنگی اور تربیت کے معیار کو بہتر بنانا تھا۔ دمشق ائیر فورس نے ماسکو فضائیہ کے تعاون سے چوبیس گھنٹے کی مشترکہ مشق کا انعقاد کیا، جس میں روسی ”سخوئی” اور شامی ”مِگ” لڑاکا طیاروں نے دشمن کے فرضی جنگی جہازوں کا مقابلہ کیا۔