کشمیر سے متعلق نئی دہلی کی سخت گیر پالیسی نوجوان کُش ثابت ہورہی ہے، فاروق عبداللہ

جموں و کشمیر نیشنل کانفرنس کے سربراہ ڈاکٹر فاروق عبداللہ نے کہا کہ بھارت کے سخت گیر حکمرانوں کی غیر سنجیدہ اور غیر دانشمندانہ پالیسی نے جموں و کشمیر کی نوجوان پود کو نہ صرف پشت بہ دیوار کردیا ہے بلکہ مایوسی، نااُمیدی اور ذہنی پریشانیوں کی طرف دھکیل دیا ہے۔ انہوں نے کہا کہ جموں و کشمیر سے متعلق نئی دہلی کی سخت گیر پالیسی نوجوان کُش ثابت ہورہی ہے۔ ڈاکٹر فاروق عبداللہ نے کہا کہ نوجوان پود قوم کے مستقبل کے معمار اور روشن ستارے ہوتے ہیں جن کے کندھوں پر قوم کی بھاگ ڈور سنبھالنے کی ذمہ داریاں ہوتی ہیں۔ انہوں نے کہا کہ نیشنل کانفرنس نے ہمیشہ نوجوانوں کی پشت پنہائی اور حوصلہ افزائی کی اور نوجوانوں کو ہی مستقبل کا معمار تصور کیا ہے۔ انہوں نے کہا کہ پارٹی کے آئین اثاثی اور نیا کشمیر میں نوجوانوں کے حقوق اور قوم کے تئیں ذمہ داریوں کا خلاصہ واضح طور پر کیا گیا ہے۔

فاروق عبداللہ نے کہا کہ آج جموں و کشمیر کے ساتھ ساتھ نیشنل کانفرنس کے خلاف بھی سازشیں اور مکروہ منصوبے جاری ہیں۔ انہوں نے کہا کہ ابن الوقت اور موقعہ پرست سیاستدانوں نے کشمیر دشمنوں کیساتھ درپردہ طور پر ہاتھ ملا کر رکھا ہے اور جموں و کشمیر کے ہر ایک باشندے کو یہ بات ذہن میں رکھنی چاہیئے کہ اندرونی دشمن ہی سب سے بڑا دشمن ہوتا ہے، ایسے عناصر سے ہوشیار رہنا اور ان کی حربوں اور مکروہ عزائم سے لوگوں کو باخبر کرنا ہماری ذمہ داری ہے اور اس کام میں نوجوان کلیدی رول ادا کرنے کے اہل ہیں۔ فاروق عبداللہ نے کہا کہ افسوس اور تشویش کی بات ہے کہ جموں و کشمیر سے متعلق نئی دہلی کی سخت گیر پالیسی نوجوان کُش ثابت ہورہی ہے۔ انہوں نے کہا کہ ہماری نوجوان نسل زیر عتاب اور زیر عذاب ہے، بے روزگاروں کی تعداد حد سے تجاوز کر گئی ہے اور ذہنی پریشانوں میں مبتلا نوجوان برے کاموں کی طرف آسانی سے راغب ہورہے ہیں