پاکستان پیپلزپارٹی کے چیئرمین بلاول بھٹو زرداری نے کہا کہ ہمارے سابق اتحادی بھی مانیں گے، باربار الیکشن کا التوا ووٹ کی عزت نہیں ووٹ کی بےعزتی ہے ،سلیکشن کی سیاست نے جمہوریت کا جنازہ نکال دیا ۔
پاکستان پیپلزپارٹی نے سانحہ کارساز کے شہدا کو خراج عقیدت پیش کرنے کیلئے کراچی میں جلسہ کیا اورملک گیر عوامی رابطہ مہم شروع کرنے کا اعلان کیا۔
عام انتخابات کی تاریخ دی جائے، عوام کو ووٹ کا حق استعمال کرنے دیا جائے ، کچھ بھی ہوجائے الیکشن کرانا ہوگا، ملک کی معاشی حالت درست نہیں ، نفرت اور تقسیم کی سیاست کے بجائے خدمت کی سیاست کرنی ہوگی اور ملک کو آئین کے مطابق چلانا ہوگا۔
سابق وزیر خارجہ نے غزہ پر اسرائیلی بمباری کی مذمت کی اور کہا کہ فلسطینیوں کو ظالمانہ طریقے سے شہید کیا جا رہا ہے، نگران وزیراعظم اور نگراں وزیر خارجہ سے مطالبہ ہے کہ فلسطینی عوام کے لیے آواز اٹھائیں۔