2024 کے ورلڈ کپ کی میزبانی کے لیے امریکا اور ویسٹ انڈیز کا انتخاب کیا گیا تھا تاہم اب کافی جائزے کے بعد امریکا کے تین شہروں کو منتخب کر لیا گیا ہے۔
ٹی ٹوئنٹی ورلڈ کپ کی میزبانی پہلی بار امریکا کو دی جا رہی ہے، ایونٹ کے میچز نیویارک، ڈیلاس اور میامی میں ہوں گے،آئندہ ٹی ٹوئنٹی ورلڈ کپ گزشتہ 2 سالوں کے ورلڈ کپ سے مختلف ہو گا۔
آئی سی سی کا کہنا ہے کہ نیویارک شہر سے 30 میل کی مسافت پر 930 ایکڑ پر پھیلے ہوئے آئزن ہاور پارک میں 34 ہزار نشستوں والا کرکٹ اسٹیڈیم بنانے کے لیے معاہدہ طے پا گیا ہے۔
ڈیلاس میں گرینڈ پریری اور فلوریڈا میں بروورڈ کاؤنٹی لاڈر ہل کے پاس پہلے سے ہی میچز کی میزبانی کے لیے بنیادی ڈھانچہ موجود ہے، البتہ آئی سی سی ان دونوں مقامات پر اسٹیڈیم کی گنجائش میں اضافے کے لیے اقدامات کرے گا۔
اس میں 20 ٹیموں کو پہلے راؤنڈ کے لیے 5، 5 کے 4 گروپوں میں تقسیم کیا جائے گا، پھر ہر گروپ سے ٹاپ ٹو ٹیمیں سپر 8 کے لیے کوالیفائی کر جائیں گی، سپر 8 ٹیموں کو 4، 4 کے دو گروپس میں تقسیم کیا جائے گا، ہر گروپ میں پہلی دو ٹیمیں سیمی فائنل میں پہنچیں گی۔