ایچ بی ایل پاکستان سپرلیگ (پی ایس ایل) 10 کے 14 ویں میچ میں پشاور زلمی نے لاہور قلندرز کو شکست دے کر 2 قیمتی پوائنٹس حاصل کرلیے۔
جمعرات کو لاہور میں کھیلے گئے میچ میں پشاور زلمی نے لاہور قلندرز کے خلاف ٹاس جیت کر بولنگ کا فیصلہ کیا۔
لاہور قلندرز کی ٹیم پہلے کھیلتے ہوئے 20 ویں اوور میں 129 رنز بنا کر آؤٹ ہوگئی۔
پشاور زلمی نے 130 رنز کا ہدف 3 وکٹوں کے نقصان پر 17ویں اوور میں حاصل کرلیا۔ زلمی کے کپتان بابر اعظم نے سیزن کی پہلی نصف سنچری بنائی۔ بابر اعظم 56 رنز کے ساتھ ناقابل شکست رہے۔
یوں زلمی نے قلندرز کو 7 وکٹوں سے شکست دے کر ایونٹ میں 2 قیمتی پوائنٹس حاصل کرلیے۔
پوائنٹس ٹیبل کی صورتحال
پی ایس ایل 10 کے پوائنٹس ٹیبل پر نظر ڈالیں تو اسلام آباد یونائیٹڈ 5 میچز میں مسلسل کامیابی حاصل کرکے 10 پوائنٹس کے ساتھ پہلی پوزیشن پر براجمان ہے۔
کراچی کنگز نے اب تک 5 میچز کھیلے ہیں جس میں 3 میں کامیابی اور 2 میں اسے شکست ہوئی، وہ 6 پوائنٹس کے ساتھ دوسرے نمبر پر ہے۔
لاہور قلندرز اور پشاور زلمی 5، 5 میچز کھیل کر 2،2 کامیابیوں کے ساتھ 4، 4 پوائنٹس کے ساتھ بالترتیب تیسری اور چوتھی پوزیشن پر ہے۔
کوئٹہ گلیڈی ایٹرز نے اب تک 3 میچز کھیلے ہیں جس میں اسے ایک میں کامیابی ملی جبکہ 2 میں اسے شکست ہوئی۔ کوئٹہ 2 پوائنٹس کے ساتھ پانچویں نمبر پر ہے۔
ملتان سلطانز 5 میچز میں صرف ایک میں کامیابی حاصل کرنے کے بعد پوائنٹس ٹیبل پر آخری پوزیشن پر ہے۔
واضح رہے کہ ٹاپ 4 ٹیمیں پی ایس ایل کے پلے آف مرحلے کیلئے کوالیفائی کریں گی۔