لائن آف کنٹرول (ایل او سی) پر آزاد کشمیر کے 2 شہریوں کو شہید کرکے دہشت گرد قرار دینے کا بھارتی دعویٰ علاقہ مکینوں نے مسترد کر دیا۔
منگل کو مقبوضہ جموں کشمیر کے سیاحتی مقام پہلگام میں نامعلوم افراد کی فائرنگ سے 26 سیاح ہلاک 12 زخمی ہوگئے۔
بھارتی حکام کے مطابق ہلاک ہونے والوں میں2 غیر ملکی سیاح اور بھارتی بحریہ کا افسر بھی شامل تھے،غیر ملکیوں کا تعلق اٹلی اور اسرائیل سے ہے۔
اس واقعے کے بعد ایل اوسی پربھارت فورسز نے آزاد کشمیرکے 2 شہریوں کو شہید کیا اور دعویٰ کیا کہ وہ دہشت گرد تھے۔
تاہم علاقہ مکینوں نے بھارتی دعوے کو مسترد کر دیا۔
متعلقہ علاقے کے لوگوں کا کہنا ہے کہ بھارتی فورسز کے ہاتھوں مارے گئے دونوں افراد ضیعف العمر تھے جو اپنے مویشی ڈھونڈنے گئے تھے۔
انہوں نے کہا کہ ملک فاروق اور محمد دین کی عمریں 60 سال کے لگ بھگ تھیں ، سارا علاقہ انہيں جانتا ہے ، ان کے خاندان یہاں صدیوں سے آباد ہیں اور یہ دونوں افراد مال مویشی چراتے تھے۔
دوسری جانب پہلگام حملے کے بعد کشمیری عوام بھارتی میڈیا کے جھوٹے دعوؤں کے خلاف سڑکوں پر نکل آئے۔
کشمیری عوام نے بھارتی فالس فلیگ آپریشن مسترد کرتے ہوئے کہا کہ ٹی وی چینلز پر ہر جگہ ہندو مسلمان کی بات ہو رہی ہے ،حکومت بتائے کہ حملے کے وقت بھارتی خفیہ ایجنسیز کیا کر رہی تھیں، پہلے بھی ایسا ہوا ہے کہ یہ ایجنسیزخود دہشت گرد حملوں کے پیچھے ہوتی ہیں۔
واضح رہے کہ بھارت نے مقبوضہ کشمیرکے علاقے پہلگام میں ہونے والے حملے کو بہانہ بنا کر پاکستان سے سندھ طاس معاہدہ معطل کرنے اور اٹاری چیک پوسٹ بند کرنےکا اعلان کیا ہے۔