اڈیالہ جیل کا انٹرنیٹ خراب ہونے کی وجہ سے ضمانت کے 6 کیسز میں بانی پی ٹی آئی عمران خان کی ویڈیو لنک پر پیشی ممکن نہ ہوسکی۔
منگل کو عمران خان کی 6 اور اہلیہ بشریٰ بی بی کی ایک مقدمے میں درخواست ضمانت پر سماعت ایڈیشنل سیشن جج محمد افضل مجوکہ نے کی۔
عمران خان کے خلاف 6 اور اہلیہ بشریٰ بی بی کے خلاف جعلی رسیدوں کے کیس میں عدالتی احکامات کے باوجود بانی پی ٹی آئی کو پیش نہیں کیا گیا اور ویڈیو لنک کے ذریعے بھی پیشی ممکن نہ ہو سکی۔
بانی پی ٹی آئی کے وکیل خالد یوسف چوہدری عدالت کے روبرو پیش ہوئے۔عدالت نے حکم دیا تھا کہ بانی پی ٹی آئی کو پیش کیا جائے۔
عدالت نے وکیل سے مکالمہ کرتے ہوئے کہا کہ آپ انتظار کریں، بصورت دیگر ویڈیو لنک چیک کر لیتے ہیں، سماعت میں وقفہ کیا گیا، وقفے کے دوران عدالتی عملے نے جیل حکام سے بانی پی ٹی آئی کے ویڈیو لنک کے ذریعے پیشی کے لیے رابطہ کیا تو جیل حکام نے آگاہ کیا کہ انٹرنیٹ کی خرابی کے باعث عمران خان کو پیش نہیں کیا جا سکتا۔
جیل حکام نے ڈسٹرکٹ سیشن کورٹ اسلام آباد سے معذرت کرلی۔جیل حکام کے جواب کے بعد عدالت نے کیس کی سماعت 6 مئی تک ملتوی کر دی۔
دوسری جانب عمران خان اور بشریٰ بی بی کے وکلا کی جانب سے کیس کا فیصلہ بلا تاخیر میرٹ پر سنائے جانے کی متفرق درخواست دائر کی گئی۔
درخواست میں مؤقف اپنایا گیا کہ 23 اگست 2023 کو گرفتاری سے پہلے ضمانت کی درخواستیں دائر کی گئی تھی۔ اس وقت درخواست گزار جیل میں ہیں، عدالت متعدد بار پیشی کا حکم دے چکی ہے، ویڈیو لنک پر بھی پیشی کے احکامات کی تعمیل نہیں ہو سکی، اب پولیس اور جیل حکام نے بغیر پیشی میرٹ پہ فیصلہ سنائے جانے کے علاوہ کوئی آپشن نہیں چھوڑا، انصاف کا تقاضہ ہے کہ میرٹ پر فیصلہ سنایا جائے۔
یاد رہے کہ عمران خان کے خلاف تھانہ ترنول میں 2، تھانہ کراچی کمپنی ، تھانہ کوہسار، تھانہ سیکرٹریٹ میں مقدمات درج ہیں جبکہ ان کی اہلیہ پر جعلی رسیدیں جمع کروانے پر فراڈ کا مقدمہ درج ہے۔