متحدہ عرب امارات (یو اے ای) کے قونصل جنرل کراچی بخیت عتیق الرومیثی کا کہنا ہے کہ آئندہ برسوں میں یو اے ای پاکستان میں بڑی سرمایہ کاری کرےگا۔
یو اے ای کے قونصل جنرل کراچی بخیت عتیق الرومیثی کی جانب سے کراچی کی بزنس کمیونٹی کے اعزاز میں خصوصی دعوت افطار دی گئی جس میں کراچی کے نامور تاجروں نے شرکت کی۔
افطار ڈنر میں پاکستان کے ہیلتھ سیکٹر اور ایجوکیشن سے منسلک نامی گرامی شخصیات بھی خصوصی طور پر شریک ہوئیں۔افطار ڈنر کے دوران تاجروں کی تواضع پاکستانی و عربی کھانوں اور مشروبات کے ذریعے کی گئی۔
اس موقع پر قونصل جنرل یو اے ای بخیت عتیق الرومیثی کا کہنا تھا کہ پاکستان اور متحدہ عرب امارات کے تعلقات کئی دہائیوں پر محیط ہیں۔ آنے والے برسوں کے دوران یو اے ای پاکستان میں بڑی سرمایہ کاری کررہا ہے۔ ماضی میں پاکستان کا یو اے ای کی ترقی میں ایک کلیدی کردار رہا ہے۔ یو اے ای کے صحت شعبہ میں ان گنت پاکستانی ڈاکٹرز اپنی خدمات انجام دے رہے ہیں۔
بخیت عتیق الرومیثی نے کہا کہ کھیلوں کے شعبے میں بھی دونوں ملکوں کے باہمی تعاون کے لیے بے شمار مواقع موجود ہیں۔ دونوں ممالک کے درمیان فوڈ سکیورٹی کے شعبوں میں کام کیا جاسکتا ہے۔
ان کا مزیدکہنا تھا کہ یو اے ای حکومت پاکستان کی معیشت کے استحکام کے لیے ہر ممکن کوششیں اور تعاون ہر سطح پر کر رہی ہے، پاکستان میں ہونے والا پہلا بین الاقوامی کھجور فیسٹیول اس کا عملی ثبوت ہے۔