وزیراعظم شہباز شریف نے نوجوانوں کو ہنر اور کھپت کے مطابق تربیتی پروگرامز دینے کے منصوبے کی منظوری دے دی۔
وزیر اعظم آفس کی جانب سے جاری اعلامیے کے مطابق جمعرات کو وزیراعظم شہباز شریف کی زیرصدارت نیشنل یوتھ امپلائیمنٹ پلان پر جائزہ اجلاس ہوا۔
اجلاس میں نوجوانوں کو ہنر اور کھپت کے مطابق تربیتی پروگرامز دینے کے منصوبے کی منظوری دی گئی۔
اعلامیے کے مطابق وزیراعظم شہباز شریف منصوبے پر عملدرآمد کی خود نگرانی کریں گے، وزیراعظم نے اس متعلق ماہانہ جائزہ اجلاس کی خود صدارت کرنے کا فیصلہ کیا ہے۔
اعلامیے میں کہا گیا کہ اجلاس میں وزیر اعظم نے مقامی صنعتوں میں درکار ہنر سے متعلق ایک جامع ڈیٹا بیس بنانے کی ہدایت بھی کی۔
اس موقع وزیر اعظم شہباز شریف نے کہا کہ پاکستان کے باصلاحیت نوجوان ملک کا سب سے قیمتی اثاثہ ہیں، نوجوانوں کو ضروری ہنر کی فراہمی سے با اختیار اور برسر روزگار بنا رہے ہیں۔
وزیر اعظم کا کہنا تھا کہ نوجوانوں کو تربیت سے افرادی قوت کی برآمد بڑھانے کیلئے اقدامات کر رہے ہیں۔