ساہیوال میں دیسی گھی میں جعلسازی کا منصوبہ ناکام بنا دیا گیا۔
پنجاب فوڈ اتھارٹی نے ساہیوال میں مین جی ٹی روڈ الفلاح بینک کے قریب ڈیری مینوفیکچرنگ یونٹ پر چھاپہ مار کر 1200 کلو جعلی دیسی گھی برآمد کر لیا۔
فیکٹری میں جعلی دیسی گھی کی تیاری میں استعمال ہونے والی متعلقہ میشنری بھی ضبط کر لی گئی ہے۔
فوڈ اتھارٹی کے حکام کے مطابق فیکٹری میں بناسپتی گھی کی ملاوٹ کر کے جعلی دیسی گھی تیار کیا جا رہا تھا، فیکٹری کی پروڈکشن کو اصلاح تک فوری طور پر بند کر دیا گیا اور مالک کے خلاف مقدمہ درج کر لیا گیا۔
ترجمان فوڈ اتھارٹی کے مطابق دیسی گھی کے نمونے لے کر مزید جانچ کیلئے لیبارٹری بھیج دیئے گئے ہیں تاکہ اس کی اصلیت کا تعین کیا جا سکے، اس کارروائی سے جعل سازی کے ایک بڑے منصوبے کو ناکام بنا دیا گیا ہے۔
حکام کا کہنا ہے کہ خوراک میں جعل سازی اور دھوکہ دہی کرنے والوں کو کوئی رعایت نہیں دی جائے گی۔