حکیم الامت نے اسلامیان برصغیر کو فکری تحرک عطا کیا، ڈاکٹر طاہرالقادری

تحریک منہاج القرآن کے بانی و سرپرست ڈاکٹر محمد طاہرالقادری نے حکیم الامت حضرت علامہ ڈاکٹر محمد اقبالؒ کے 84ویں یوم وفات کے موقع پر اپنے پیغام میں کہا ہے کہ حکیم الامت نے امت مسلمہ کو آزاد وطن کا تصور دیا اور فکری اعتبار سے منتشر امہ کو اتحاد و یگانگت کا پیغام دیا، برصغیر کے مسلمانوں کی خوشی قسمتی ہے کہ انھیں حکیم الامت کی صورت میں ایک فکری قائد ملا اور اس فکری قائد کے افکار پر اس کی روح کے مطابق عمل نہ کرنا بدقسمتی ہے۔ انہوں نے کہا کہ حکیم الامت ایک راسخ العقیدہ بندہ خدا اور سچے عاشق رسول تھے، اقبال رحمۃ اللہ علیہ کا کلام قرآنی فکر کا منظوم بیان ہے۔

انہوں نے کہا کہ علامہ اقبال ؒ کے افکار نے جمود کا شکار اسلامیان برصغیر کو فکری تحرک عطا کیا۔ انہوں نے کہا کہ علامہ محمد اقبال رح نے امت کی تشکیل میں جغرافیہ اور مادیت پرستی کو زہر قاتل قرار دیا، وہ امت مسلمہ کو ایک نظریاتی قوم کے طور پر پھلتا پھولتا دیکھنے کے آرزو مند تھے، اقبال رح کی یہی فکر اتحاد امت کی ضامن ہے۔ علامہ اقبال رح کا یہ راسخ نظریہ اور عقیدہ تھا کہ امت مسلمہ کی بقاء کا راز صرف اور صرف قران اور صاحب قرآن کیساتھ تعلق قائم رکھنے میں ہے۔ انہوں نے کہا کہ باوقار شناخت کیلئے امت سائنس طب ٹیکنالوجی پر دسترس حاصل کرے۔