فلسطین کی مزاحمتی تنظیم حماس نے اسرائیلی مطالبے پر غزہ جنگ بندی معاہدے کے پہلے مرحلے میں توسیع سے انکار کر دیا۔
غیر ملکی خبر رساں ایجنسی کے مطابق حماس کے سینیئر عہدے دار نے کہا ہے کہ حماس جنگ بندی معاہدے کے پہلےمرحلے میں توسیع پرراضی نہیں ہے۔
حماس کے سینیئرعہدے دار کا کہنا ہے کہ اسرائیلی یرغمالیوں کو پہلے سے طے معاہدے کے تحت مرحلہ وار رہا کیا جائے گا۔
واضح رہے کہ غزہ جنگ بندی کے پہلے مرحلے کا اختتام ہفتےکو ہوا تھا۔جس کے بعد اسرائیل نے غزہ میں کھانے پینے سمیت ہر قسم کے سامان کا داخلہ روک دیا۔
اسرائیل نے جنگ بندی میں عارضی توسیع کا اعلان بھی کیا تھا۔یہ توسیع کی تجویز امریکا نے دی تھی مگر اب اسرائیل نے یوٹرن لیتے ہوئے امداد کو مکمل طور پر روک دیا۔
اسرائیل نے امریکی تجویز پر پہلے مرحلے میں توسیع کا اعلان کرتے ہوئے تمام یرغمالیوں کی رہائی کا مطالبہ کیا تھا۔
تاہم حماس نے دوسرا مرحلہ شروع کرنے اور مکمل جنگ بندی پر زور دیتے ہوئے کہا کہ معاہدے سے انحراف کے نتائج کی مکمل ذمہ داری اسرائیل پر ہوگی۔
اسرائیل کا کہنا ہے کہ حماس جنگ بندی میں توسیع کے امریکی منصوبے پر اتفاق کرے۔
واضح رہے کہ جنگ بندی معاہدے کے مطابق دوسرے مرحلے میں باقی رہ جانے والے 59 یرغمالیوں کی رہائی، اسرائیلی فوج کا مکمل انخلا اور جنگ کا خاتمہ شامل ہے۔