وزیراعظم شہباز شریف کے مشیر برائے سیاسی و عوامی امور رانا ثناء اللہ کا کہنا ہے قومی ٹیم کی آئی سی سی چیمپئینز ٹرافی میں ذلت آمیز شکستوں اور ٹورنامنٹ سے باہر ہونے پر نوٹس لیا جائے گا۔
نجی ٹی وی چینل پر گفتگو کرتے ہوئے مسلم لیگ ن کے رہنما اور وزیراعظم کے مشیر برائے سیاسی و عوامی امور رانا ثناء اللہ کا کہنا تھا کہ قومی ٹیم کی کارکردگی پر شہباز شریف ذاتی طور پر نوٹس لیں گے اور کرکٹ سے متعلق معاملات کو کابینہ اور پارلیمنٹ میں اٹھائیں گے۔
مسلم لیگ ن کے رہنما اور سینئیر سیاستدان رانا ثنا اللہ نے کہا کہ پاکستان کرکٹ بورڈ (پی سی بی) ایک آزاد ادارہ ہے، جو چاہے کرسکتا ہے لیکن ذاتی طور پر وزیر اعظم شہباز سے اس معاملے کو کابینہ اور پارلیمنٹ میں اٹھانے کیلئے کہوں گا، یہ صرف ایک چیئرمین کی تقرری کی بات نہیں۔
بورڈ میں کام کرنیوالوں کی تنخواہوں کے حوالے سے کیے گئے سوال پر رانا ثنا اللہ نے کہا کہ اعلیٰ عہدیداروں کو سیلریز کی مد میں 50 لاکھ روپے تک دیے جارہے ہیں جسکا انہوں نے میڈیا پر اقرار کیا ہے، کئی عہدیدار اپنی ذمہ داریوں سے لاعلم ہیں اور انہیں کچھ نہ کرنے پر معاوضہ دیا جارہا ہے۔
وزیراعظم کے مشیر نے مزید کہا کہ بورڈ کے افسران کی مراعات کے بارے میں سن کر آپ حیران رہ جائیں گے، آپ کو یہ الجھن ہوگی کہ وہ پاکستانی ادارے کے اہلکار ہیں یا کسی ترقی یافتہ ملک سے تعلق رکھنے والے۔
رانا ثنا اللہ نے کہا کہ پی سی بی میں یہ مسائل برسوں سے چل رہے ہیں، لوگ طاقت کے ذریعے [کرکٹ بورڈ میں] چارج لیتے ہیں اور پھر وہ جو چاہتے ہیں کرتے ہیں، جس سے پاکستان کرکٹ بورڈ کی موجودہ حالت خراب ہوتی جارہی ہے۔
خیال رہے کہ 29 سال بعد پاکستان آئی سی سی ایونٹ کی میزبانی کررہا تھا، جس میں شریک قومی ٹیم محض ایونٹ کے چوتھے ہی روز ٹورنامنٹ سے باہر ہوگئی۔
گرین شرٹس کو پہلے میچ میں نیوزی لینڈ اور دوسرے میچ میں روایتی حریف بھارت کے ہاتھوں شکست کا منہ دیکھنا پڑا تھا تاہم ایونٹ میں قومی ٹیم آج اپنا آخری میچ بنگلادیش کیخلاف کھیلے گی۔