گورنر سٹیٹ بینک جمیل احمد نے کہا ہے ڈیجیٹل بینکنگ اور گرین انرجی کیلئے خصوصی اقدامات کر رہے ہیں۔
پاکستان کی پہلی بینکنگ سمٹ کانفرنس سے گفتگو کرتے ہوئے جمیل احمد کا کہنا تھا کہ پاکستان کا بینکنگ سیکٹر مزید بہتر ہورہا ہے اور معاشی صورتحال کو اور بہتر انداز میں سپورٹ کر رہا ہے، نئے کاروبار کے مواقع پیدا کرنے کیلئے پاکستان کا بینکنگ سیکٹر مالیاتی فنڈنگ پر خاص فوکس کر رہا ہے۔
انہوں نے کہا کہ ڈیجیٹل بینکنگ اور گرین انرجی کیلئے سٹیٹ بینک خصوصی اقدامات کررہا ہے، بینکوں کو ہدایت کی ہے صارفین کو بروقت ڈیجیٹل پے منٹ سہولیات سے آراستہ کریں جبکہ فنانشل استحکام کیلئے ضروری ہے صارفین کے ڈیٹا کو محفوظ تر بنایا جائے۔
جمیل احمد کا کہنا تھا کہ سٹیٹ بینک جدید ٹیکنالوجی کے ساتھ بینکنگ سسٹم کو آپریٹ کررہا ہے، مرکزی بینک کی کامیابی راست پیمنٹ سسٹم ہے جس کااستعمال 8ہزار سے زائد مرچنٹس کر رہے ہیں۔
گورنر سٹیٹ بینک نے مزید کہا کہ ملک میں بینکنگ سروسز کی بہتری صرف ٹیکنالوجی کی مدد سے ہوسکتی ہے، حکومت کو آنے والے وقت میں قرضوں کی فراہمی میں کمی کا سامنا ہوگا۔