آئی سی سی چیمپئنز ٹرافی 2025 کے پاک بھارت میچ میں بھارت کی شکست کی پیشگوئی کرنے والا سادھو بابا مشکل میں پڑگیا۔
میچ سے متعلق سادھو بابا کی جانب سے کی گئی پیشگوئی بری طرح غلط ثابت ہوئی جس کے بعد سوشل میڈیا پر میمز کی بھرمار ہوگئی۔
آئی ٹی بابا کے نام سے مشہور بھارتی سادھو ابھے سنگھ نے میچ سے قبل پورے یقین سے کہا تھا کہ بھارت یہ مقابلہ ہار جائے گا اور ویرات کوہلی ناکام ہوں گے۔ انکی ویڈیو وائرل ہوگئی اور کئی صارفین نے ان کی پیشگوئی کو سنجیدگی سے لینا شروع کردیا۔
بابا نے کہا تھا کہ "میں تم سب کو پہلے سے کہہ رہا ہوں، اس بار بھارت نہیں جیتے گا۔ ویرات کوہلی سمیت سب کو کہہ دو کہ آج جیت کر دکھائیں۔ میں نے کہہ دیا ہے کہ نہیں جیتیں گے تو نہیں جیتیں گے۔ اب کیا، بھگوان بڑے ہیں یا تم بڑے ہو؟”
بابا کی پیشگوئی کے برعکس بھارت نے پاکستان کو چھ وکٹوں سے شکست دے دی اور ویرات کوہلی نے شاندار ناقابل شکست 100 رنز بنا ڈالے۔
جیسے ہی بھارت نے میچ جیتا، سوشل میڈیا پر ٹرینڈ کرنے لگا اور صارفین نے طنزیہ پوسٹس اور میمز کی بھرمار کر دی۔
کئی صارفین نے بابا کے بیان کی ویڈیوز شیئر کرکے ان پر طنز کیا۔ ایک صارف نے لکھا:
"بھائیو! ہمیں اس بابا کو زندہ پکڑنا ہے اور بھارت سے باہر نکالنا ہے!”
ایک اور صارف نے کہا:
سبق: پیشگوئیوں پر بھروسہ مت کرو!”
یہاں تک کہ کچھ صارفین نے مذاق میں لکھا:
اب آئی ٹی بابا کو پاکستانیوں سے زیادہ ٹرول کیا جائے گا!”
واضح رہے کہ بھارت نے اتوار کو دبئی میں کھیلے گئے آئی سی سی چیمپئنز ٹرافی کے میچ میں پاکستان کو چھ وکٹوں سے شکست دی تھی۔
پاکستان نے پہلے بیٹنگ کرتے ہوئے 242 رنز کا ہدف دیا جسے بھارت نے 42.3 اوورز میں با آسانی حاصل کر لیا۔
اس جیت کے ساتھ بھارت نے چیمپئنز ٹرافی کے سیمی فائنل میں اپنی جگہ پکی کرلی۔