مشیر اطلاعات پختونخوا بیرسٹر ڈاکٹر سیف نے کہا ہے کہ مریم نواز معیاری ترقیاتی منصوبوں کیلئے علی امین گنڈاپور سے خاص تربیت لیں۔
اپنے بیان میں بیرسٹر سیف کا کہنا تھا کہ جعلی وزیرِ اعلیٰ مریم نواز نے سڑک کو چونا لگانے کی کوشش میں قومی خزانے کو چونا لگا دیا، پہلی بارش نے بائیکرز کیلئے بنائے گئے کروڑوں روپے کے منصوبے کا پول کھول دیا، لاہور کا گرین لائن منصوبہ نااہل وزیرِ اعلیٰ مریم نواز کے تمام منصوبوں کی عکاسی کرتا ہے۔
انہوں نے کہا کہ مریم نواز کو معیاری ترقیاتی منصوبوں کیلئے علی امین گنڈا پور سے خصوصی تربیت لینے کی ضرورت ہے، ترقیاتی منصوبوں میں کام سے زیادہ کمیشن لینا شریف خاندان کا پرانا وتیرہ ہے، صرف ٹک ٹاک بنانے کی غرض سے بنائے گئے منصوبوں کا یہی حال ہوتا ہے۔
رہنما پی ٹی آئی کا کہنا تھا کہ عوام کے ٹیکسوں کا پیسہ راج کماری مریم نواز اپنی نااہلی کی نذر کر رہی ہیں، پنجاب کے تمام منصوبے جعلی وزیرِ اعلیٰ کی طرح جعلی ثابت ہو رہے ہیں۔