ایلون مسک کی نئی پالیسی سے امریکی سرکاری ملازمین میں کھلبلی مچ گئی۔
عالمی میڈیا کی رپورٹ کے مطابق معروف ارب پتی کاروباری شخصیت ایلون مسک نے امریکی سرکاری ملازمین کو خبردار کرتے ہوئے کہا ہے کہ انہیں پورے ہفتے کی کارکردگی کی تفصیلات دینا ہوں گی ورنہ انہیں مستعفی سمجھا جائے گا۔
ایلون مسک نے سوشل میڈیا پلیٹ فارم ایکس پر اپنی پوسٹ میں کہا کہ امریکا کے محکمہ برائے حکومتی کارکردگی کے تحت کام کرنے والے وفاقی ملازمین کو ایک ای میل موصول ہوگی جس کے جواب میں انہیں یہ وضاحت دینا ہوگی کہ پورے ہفتے میں کتنا کام کیا گیا ہے۔
ایلون مسک نے مزید کہا کہ اگر کسی ملازم نے ای میل کا جواب نہ دیا تو اسے ملازمت سے مستعفی تصور کیا جائے گا، ان کے اس بیان کے بعد امریکی سرکاری اداروں میں تشویش کی لہر دوڑ گئی ہے اور ملازمین اس فیصلے پر ملا جلا ردعمل دے رہے ہیں۔