آئی سی سی چیمپئینز ٹرافی کے اہم معرکے میں بھارت نے ویرات کوہلی کی شاندار اور ذمہ دارانہ سنچری کی بدولت پاکستان کو 6 وکٹوں سے شکست دے دی۔
دبئی میں کھیلے گئے میچ میں پاکستان نے 49.4 اوورز میں 241 رنز بناکر بھارت کو 242 رنز کا ہدف دیا تھا۔ کوہلی کی شاندار سنچری کی بدولت بھارت نے پاکستان کو 42.3 اوور میں 6 وکٹوں سے شکست دی۔
اوپنر امام الحق اور بابراعظم نے 41 رنز کا آغاز فراہم کیا تاہم بابر اعظم 23 رنز بناکر وکٹ گنوا بیٹھے بعد ازاں 6 رنز کے اضافے کے بعد امام بھی رن آؤٹ ہوگئے، انہوں نے 10 رنز بنائے۔
تیسری وکٹ پر محمد رضوان اور سعود شکیل نے 103 رنز کی شراکت قائم کی۔ محمد رضوان 46 اور سعود شکیل 62 رنز بناکر آؤٹ ہوگئے، طیب طاہر صرف 4 رنز بناکر پویلین لوٹ گئے۔
سلمان علی آغا 19 ، شاہین آفریدی صفر اور نسیم شاہ 14 رنز بناکر آؤٹ ہوگئے، حارث روف 8 رنز بناکر رن آؤٹ ہوئے جبکہ خوشدل شاہ 38 رنز بناسکے۔
بھارت کی جانب سے کلدیپ یادو نے 3، ہاردک پانڈیا نے 2، رویندرا جڈیجا، اکشر پٹیل اور ہرشیت رانا نے ایک، ایک وکٹ حاصل کی۔
قومی ٹیم کے کپتان محمد رضوان نے ٹاس جیت کر پہلے بیٹنگ کا فیصلہ کیا تھا۔
بھارت کی اننگز
بھارت کی جانب سے ہدف کے تعاقب میں بیٹنگ کا آغاز روہت شرما اور شبھمن گل نے کیا جبکہ اٹیک اوور شاہین شاہ آفریدی نے پھینکا۔
شاہین شاہ آفریدی نے اننگ کے پانچویں اوور کی آخری گیند پر روہت شرما کو کلین بولڈ کر کے 20 کے انفرادی جبکہ 31 کے مجموعی اسکور پر پویلین بھیجا۔
بھارت نے ابتدائی دس اوور میں 1 وکٹ کے نقصان پر 64 رنز بنائے، اس موقع پر شبھمن گل 35 اور کوہلی چھ رنز کے ساتھ وکٹ پر موجود تھے۔
بعد ازاں ابرار احمد نے 17.3 اوور میں بھارتی بلے باز شبھمن گل کو 45 رنز پر کلین بولڈ کر کے پویلین بھیجا، یوں بھارت کو 100 کے مجموعی اسکور پر دوسرے نقصان کا سامنا کرنا پڑا۔
ویرات کوہلی اور شریاس ائیر نے شاندار بیٹنگ کرتے ہوئے 114 رنز کی شراکت داری قائم کی تاہم 214 کے مجموعی اور 56 کے انفرادی اسکور پر شریاس امام الحق کے ہاتھوں شاندار کیچ کے بعد پویلین روانہ ہوئے۔
اس کے بعد اگلے ہی اوور میں شاہین آفریدی نے کریز پر آتے ہی جارحانہ انداز اپنانے والے بلے باز ہاردک پانڈیا کو 223 کے مجموعی اسکور پر پویلین بھیجا، انہوں نے 6 گیندوں پر 1 چوکے کی مدد سے 8 رنز کی اننگز کھیلی۔
بھارت کی جانب سے ویرات کوہلی 100 رنز بناکر ناقابل شکست رہے جبکہ شریاس نے 56 اور شبھمن گل نے 46 رنز کی اننگز کھیلی۔ بھارت نے پاکستان کی جانب سے دیا گیا 242 رنز کا ہدف 45 گیندوں پہلے چار وکٹوں کے نقصان پر حاصل کیا۔
شاہین آفریدی نے دو جبکہ ابرار احمد اور خوش دل شاہ نے ایک ایک وکٹ حاصل کی۔
پاکستان کا اسکواڈ:
کپتان محمد رضوان، امام الحق، بابراعظم، سعود شکیل، سلمان علی آغا، طیب طاہر، خوشدل شاہ، شاہین آفریدی، نسیم شاہ، حارث روف اور ابرار احمد
بھارت کا اسکواڈ:
کپتان روہت شرما، شبمن گل، ویرات کوہلی، شریاس آئیر، اکشر پٹیل، کے ایل راہول، ہاردک پانڈیا، رویندر جڈیجا، ہرشیت رانا، محمد شامی اور کلدیپ یادو