آج، 23 فروری، بیروت میں اسلامی مزاحمت کے عظیم قائد، حزب اللہ کے سیکرٹری جنرل سید حسن نصر اللہ اور ان کے رفیقِ جدوجہد سید ہاشم صفی الدین (رضوان اللہ علیہما) کی تشییع و تدفین انجام پائی، جہاں لاکھوں عقیدت مندوں نے انہیں الوداع کہا۔
اسی مناسبت سے، آیت اللہ العظمٰی شیخ محمد الیعقوبی (دام ظلہ) کے نمائندہ اور شوریٰ علمائے جعفریہ پاکستان کے سربراہ علامہ شیخ ہادی حسین ناصری کی جانب سے ایک خصوصی بیان جاری کیا گیا۔
بیان میں کہا گیا کہ یہ شہادت ایک ناقابلِ تلافی نقصان ضرور ہے، لیکن یہ قربانی امتِ مسلمہ کے عزم کو مزید تقویت بخشے گی، جدوجہدِ مقاومت میں نئی روح پھونکے گی، اور حق و باطل کے معرکے میں ایک نیا باب رقم کرے گی۔
مکمل بیان:
بِسْمِ اللَّهِ الرَّحْمَٰنِ الرَّحِيمِ
آج امتِ مسلمہ نے دو عظیم مجاہدوں، استقامت کے ستونوں، اور عزیمت کے میناروں کو سپردِ خاک کیا، جو اپنی زندگیاں مزاحمت، عزت، اور آزادی کی راہ میں وقف کر چکے تھے۔ یہ دونوں صرف شخصیات نہیں، بلکہ ایک نظریہ، ایک تحریک، اور ایک زندہ حقیقت تھے، جو حق و حریت کے متوالوں کے لیے ہمیشہ روشنی کا مینار بنے رہیں گے۔
یہی وہ مردانِ حق تھے جنہوں نے اسرائیل کے ناپاک عزائم کو خاک میں ملایا، مقبوضہ زمین کو آزاد کرایا، اور دنیا کو باور کرایا کہ غیر متزلزل ایمان، پختہ عزم، اور قربانی کا جذبہ ظلم و استبداد کے ایوانوں کو لرزا دینے کی قوت رکھتا ہے۔ ان کی بے مثال قربانیاں اور مسلسل استقامت ہمیشہ تاریخ کے سنہری صفحات میں رقم رہے گی اور آئندہ نسلوں کے حوصلے کو جِلا بخشتی رہے گی۔
آج زبانیں اس محبت، عقیدت، اور فخر کو بیان کرنے سے قاصر ہیں جو ہمارے دلوں میں ان شہداء کے لیے موجزن ہے۔ ہم نے بلاشبہ دو عظیم قائدین کو کھو دیا، لیکن ان کا مشن، ان کی جدو جہد، اور ان کی مزاحمت ہمیشہ زندہ رہے گی۔ وہ نہ صرف فاتحین کے زمرے میں شامل ہیں، بلکہ ایثار، استقامت، اور عزیمت کی وہ علامت ہیں جو کبھی مٹنے والی نہیں۔
یہ شہادت بلاشبہ ایک بڑا نقصان ہے، لیکن ان کا خون ملتِ اسلامیہ میں ایک نئی روح پھونک دے گا، ہماری جدوجہد کو مزید تقویت بخشے گا، اور راہِ مقاومت میں نیا حوصلہ پیدا کرے گا۔ ہم دشمن کو یہ پیغام دینا چاہتے ہیں کہ یہ خون ہرگز رائیگاں نہیں جائے گا، بلکہ ہر شہید ایک نئے مجاہد کو جنم دے گا، ہر قطرۂ خون ایک نئی مزاحمت کو فروغ دے گا، اور ہر قربانی ایک نئے انقلاب کی بنیاد بنے گی۔
اے شہداء! تمہارا نام ہمیشہ زندہ رہے گا، تمہارا مشن کبھی نہیں رکے گا، اور تمہاری قربانی ہمیشہ حق کے متوالوں کے لیے روشنی کا چراغ بنی رہے گی۔
"وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ” (آل عمران: 169)
وَالسَّلَامُ عَلَى مَنْ اتَّبَعَ الْهُدَى