بھارتی کرکٹ ٹیم کے سابق کھلاڑی وریندر سہواگ نے اپنے پانچ بہترین بلے بازوں کے نام بتادیے جس میں ایک پاکستانی کھلاڑی کا نام بھی شامل ہے۔
بھارتی میڈیا رپورٹ کے مطابق وریندر سہواگ نے کہا کہ انہیں یہ پانچ کھلاڑی ہمیشہ پسند رہے ہیں۔
انہوں نے ان پانچ کھلاڑیوں کو شاندار، بہترین، باصلاحیت اور دیگر تعریفی کلمات سے نوازتے ہوئے بتایا کہ اُن کے پانچ بہترین بلے بازوں میں سب سے آخری نمبر کرس گیل کا ہے۔
اس کے بعد چوتھے نمبر پر اے بی ڈویلیئرز ہیں۔ سہواگ کی فہرست میں تیسرے نمبر پر انضمام الحق کا نام ہے۔
انہوں نے کہا کہ میں نے انضمام الحق سے بہت کچھ سیکھا، وہ مشکل سے مشکل صورت حال میں مسکراتے اور اپنی کلکولیشن کے حساب سے بیٹنگ کرتے ہوئے موقع ملنے پر گیند کو باؤنڈری سے باہر پھینکتے تھے۔
سہواگ نے دوسرے نمبر پر سچن ٹنڈولکر کا انتخاب کیا جنہوں نے 463 ون ڈے میچز میں 18426 رنز بنائے۔ انہوں نے کہا کہ سچن ٹنڈولکر میرے آئیڈیل ہیں۔
سہواگ نے کہا کہ اُن کے نزدیک ویرات کوہلی کرکٹ کا بادشاہ ہے اور میرا خیال ہے کہ شاید اُس جیسا کھلاڑی اب دوبارہ نہ آئے۔