پاکستان کرکٹ بورڈ (پی سی بی) نے چیمپئینز ٹرافی 2025 کیلئے مزید ٹکٹس جاری کرنے کا فیصلہ کرلیا۔
میڈیا رپورٹس کے مطابق بورڈ 4 میچوں کیلئے اضافی ٹکٹس جاری کرے گا، ان 4 میچوں میں سے 2 میچز پاکستان اور بنگلادیش اور نیوزی لینڈ کے درمیان کھیلے جائیں گے۔
بقیہ 2 میچز روایتی حریف آسٹریلیا اور انگلینڈ کے درمیان گروپ مرحلے کے میچ ہیں جبکہ دوسرا سیمی فائنل 5 مارچ کو لاہور کے قذافی اسٹیڈیم میں کھیلا جائے گا۔
ٹکٹوں کی فروخت جمعرات کو براہ راست شروع ہوگی جبکہ شائقین آن لائن خریداری کے ذریعے اور ملک بھر میں ٹی سی ایس مراکز جاکر اپنے لئے سیٹ بک کرسکتے ہیں۔
ابتدائی اطلاعات کے مطابق پاکستان اور بنگلادیش کے درمیان ہونے والے میچ کیلئے 2 ہزار اضافی ٹکٹ فروخت کیے جائیں گے جبکہ بقیہ 3 میچوں کے لیے 5 ہزار ٹکٹس دستیاب ہوں گے۔
واضح رہے کہ آئی سی سی چیمپیئنز ٹرافی کا آغاز 19 فرروری کو پاکستان اور نیوزی لینڈ کے درمیان میچ سے ہوگا، یہ میچ نیشنل اسٹیڈیم کراچی میں کھیلا جائے۔
ایونٹ کا فائنل 9 مارچ کو شیڈول ہے، اگر بھارتی ٹیم فائنل تک رسائی حاصل کرنے میں کامیاب نہ ہوئی تو ٹورنامنٹ کا فائنل لاہور کے تاریخی قذافی اسٹیڈیم میں شیڈول ہوگا۔