بھارتی کرکٹ ٹیم کے اوپنر ابھیشیک شرما کے مخصوص جشن کے انداز کا راز فاش ہوگیا۔
بھارتی نوجوان اوپنر ابھیشیک شرما آئی پی ایل ہو یا پھر انٹرنیشنل میچ، ففٹی یا سنچری بنانے کے بعد جشن منانے کیلئے اپنا ہاتھ ہوا میں بلند کر کے تماشائیوں کی طرف ایک انگلی اور انگوٹھے کی مدد سے ‘L’ نشان بناتے ہیں۔
ابھیشیک شرما کے اس انداز کو ‘L ‘ سیلیبریشن بھی کہا جاتا ہے۔
اتوار کو انگلینڈ کے خلاف سیریز کے پانچویں اور آخری ٹی ٹوئنٹی میں ابھیشیک شرما نے بھارت کے لیے دوسری تیز ترین سنچری اسکور کی۔
ابھیشیک شرما نے37 گیندوں پر سنچری اسکور کی اور مجموعی طور پر 54 گیندوں پر 13 چھکوں اور 7چوکوں کی مدد سے 135 رنز بنائے۔
انگلینڈ کے خلاف 135 رنز کی اننگز کی بدولت ابھیشیک شرما بھارت کی جانب سے ٹی ٹوئنٹی انٹرنیشنل میں سب سے بڑا انفرادی اسکور بنانے والے کھلاڑی بن گئے۔
ابھیشیک شرما نے جیسے ہی سنچری اسکور کی تو انہوں نے اپنے مخصوص انداز میں ‘L ‘ سیلیبریشن کی۔
شائقین کرکٹ جاننا چاہتے تھے کہ ابھیشیک شرما کے اس مخصوص جشن کے انداز کا آخر مطلب کیا ہے؟، تاہم بھارتی اوپنرکے جشن کا راز فاش ہوگیا۔
انڈین پریمیئر لیگ کے آفیشل ایکس ہینڈل پر شیئر کی گئی ایک ویڈیو میں ابھیشیک شرما نے انکشاف کیا کہ یہ جشن آئی پی ایل کے دوران سن رائزز حیدرآباد سے کھیلتے ہوئے انہوں نے اور ان کے اوپننگ پارٹنر ٹریوس ہیڈ نے شروع کیا تھا۔
ابھیشیک نے بتایا کہ جشن مناتے ہوئے ‘L’ نشان کا مطلب ‘love ‘کو ظاہر کرتا ہے کہ ہم اس کھیل کے ذریعے پیار محبت پھیلا رہے ہیں۔
واضح رہے کہ سیریز کے آخری ٹی ٹوئنٹی میں بھارتی ٹیم کے247 رنز کے جواب میں انگلش ٹیم 11 ویں اوور میں صرف 97 رنز بنا کر آؤٹ ہوگئی اور یوں بھارت نے انگلینڈ کے خلاف 5 میچوں کی سیریز 1-4 سے جیت لی۔