پاکستان شاہینز کی روحیل نذیر کی قیادت میں آسٹریلیا روانگی

لاہور(شوریٰ نیوز)پاکستان شاہینز کی روحیل نذیر کی قیادت میں آسٹریلیا روانگی ،پاکستان کی ٹیم دورے کے دوران ٹی ٹونٹی سیریزاوردو ون ڈے میچ کھیلے گی،روحیل نذیر کی قیادت میں پاکستان شاہینز بدھ کی علی الصبح آسٹریلیا روانہ ہوگئی جہاں وہ ٹاپ اینڈ ٹی ٹونٹی سیریز کے علاوہ پچاس اوورز کے دو ون ڈے میچ بھی کھیلے گی۔ترجمان کے مطابق پہلا میچ 30 جولائی کو این ٹی سٹرائیک،دوسرا میچ31جولائی کواے سی ٹی کامیٹس ، تیسرا میچ یکم اگست کومیلبورن رینی گیڈز ، چوتھا2اگست کو میلبورن سٹارز ،پانچواں میچ4 اگست کوپاپوا نیو گنی کیخلاف جبکہ فائنل6 اگست کو کھیلا جائیگا۔علاوہ ازیں پچاس اوورز کا پہلا میچ8 اگست کوپاپوا نیو گنی اور دوسرا میچ9 اگست کو این ٹی سٹرائیک کیخلاف کھیلا جائیگا۔ان میچوں کا 30 جولائی سے 9 اگست تک انعقاد ڈارون میں ناردن ٹیریٹری کرکٹ ( این ٹی سی ) نے کیا ہے۔چھ ٹیموں کی اس ٹی ٹونٹی سیریز میں پاکستان شاہینز کے علاوہ آسٹریلین کیپٹل ٹیریٹری کی اے سی ٹی کامیٹس، میلبورن سٹارز، میلبورن رینی گیڈز ، پاپوا نیوگنی اور این ٹی سٹرائیک کی ٹیمیں حصہ لیں گی جس میں دو ٹاپ ٹیمیں فائنل میں جگہ بنائیں گی۔پاکستان شاہینز ان ٹی ٹونٹی میچوں کے علاوہ پاپوا نیوگنی اور این ٹی سٹرائیک کے خلاف8 اور9 اگست کو پچاس اوورز کے دو ون ڈے میچز بھی کھیلے گی۔ترجمان نے بتایا کہ 21 سالہ روحیل نذیر ماضی میں دسمبر 2020 میں پاکستان شاہینز کے دورہ نیوزی لینڈ میں بھی قیادت کرچکے ہیں۔وہ زمبابوے کے گزشتہ دورے میں بھی پاکستان شاہینز کا حصہ تھے جس نے 2 چار روزہ اور 6 ون ڈے میچ کھیلے تھے۔روحیل نذیر2018 اور 2020کے انڈر19 ورلڈ کپ میں بھی پاکستان انڈر19 ٹیم کی نمائندگی کرچکے ہیں۔انہیں چار ایسے کھلاڑیوں کی خدمات بھی حاصل ہوں گی جو اس سے قبل انڈر19 ورلڈ کپ کھیل چکے ہیں ۔ان میں احمد خان ( 2022) علی اسفند ( 2022) عرفان خان ( 2020اور 2022) اور ذیشان ضمیر ( 2022) شامل ہیں۔ان چار کھلاڑیوں کے علاوہ عامر حسن، عرفات منہاس، آزان اویس، سجاد علی، شامل حسین اور وہاج ریاض اس سال پاکستان انڈر19 کے ساتھ بنگلہ دیش کا دورہ کرچکے ہیں۔روحیل نذیر پی سی بی ڈیجیٹل سے بات کرتے ہوئے کہتے ہیں کہ ایمرجنگ ایشیا کپ جیتنے والی پاکستان شاہینز کو مبارکباد پیش کرتا ہوں، لاہور میں منعقدہ کیمپ میں تمام کھلاڑیوں نے بہت محنت کی تھی جس کا نتیجہ سب کے سامنے ہے۔انہوں نے کہا پاکستان شاہینز کی قیادت ان کے لیے بہت بڑا موقع ہے، وہ ماضی میں بھی پاکستان شاہینز کی کپتانی اور نمائندگی کرچکے ہیں۔وہ آسٹریلیا میں ٹیم کی قیادت پر پرجوش ہیں جہاں وہ اس سے قبل بھی کھیل چکے ہیں۔ ٹیم کے ہر کھلاڑی کے لیے آسٹریلیا میں کھیلنا ایک بڑا موقع ہے اور اس طرح کے ٹورنامنٹس سے انہیں بہت کچھ سیکھنے کا موقع ملے گا۔ پاکستان شاہینزمیں روحیل نذیر ( کپتان ) آلیان محمود، احمد خان، علی اسفند، عامر حسن ، عرفات منہاس، آزان اویس، باسط علی، فیصل اکرم، سجاد علی، عرفان خان، شامل حسین ، شاویز عرفان، ذیشان ضمیر اور وہاج ریاضشامل ہیں جبکہ سپورٹنگ اسٹاف میں محمد مسرور ( ہیڈ کوچ ، منیجر) حنیف ملک ( بیٹنگ اور فیلڈنگ کوچ ) عمر رشید ( بولنگ کوچ ) امتیاز خان ( فزیوتھراپسٹ) شامل ہیں۔