وزیراعلیٰ پنجاب مریم نواز کا کہنا ہے کہ بغیر کسی قصور کے 5 ماہ جیل میں رہ کر آئی ہوں لیکن جیل میں نہیں روئی۔
فیصل آباد میں طلبہ سے خطاب میں وزیراعلیٰ پنجاب مریم نواز نےکہا کہ ’جتنا پیار مجھے طلبہ کی طرف سے مل رہا ہے وہ بیان نہیں کر سکتی، میرے مخالفین کہتے ہیں کہ یہ سب کچھ اسٹیجڈ ہوتا ہے، مخالفین یہاں آکر دیکھیں کہ کس طرح ایک ماں نے اپنے بچوں کے ساتھ اپنا رشتہ قائم کر لیا ہے‘۔
وزیراعلیٰ پنجاب نے کہا کہ ’بغیر کسی قصور کے 5 ماہ جیل میں رہ کر آئی ہوں، جیل میں نہیں روئی لیکن بچوں کو جب ان کا حق اسکالر شپ کی صورت میں ملتا ہے تو اُن بچوں کی خوشی دیکھ کر آنکھوں میں آنسو آجاتے ہیں‘۔
مریم نواز کا کہنا تھاکہ ’اب پنجاب کے بچوں کے ساتھ ایسا نہیں ہوگا کہ کسی کے خواب ادھورے رہ جائیں، اس سال 30 ہزار اسکالر شپ دی ہیں، یہ چھوٹا نمبر ہے، اگلے سال 50 ہزار تک لے کر جائیں گے‘۔
دوسری جانب لاہور میں آسان کاروبار فنانس اور آسان کاروبار کارڈز کی افتتاحی تقریب سے خطاب میں وزیراعلیٰ نے کہا کہ 3 کروڑ روپے تک کا قرضہ بلا سود ملےگا، قرضہ ملنےکے بعد بھی اگرکوئی مشکل آتی ہے تو ہم مدد کریں گے، چھوٹے اور درمیانے درجے کے کاروبار کو سہولیات فراہم کریں گے۔